17 may 2023-ci il tarixində Alman-Azərbaycan Xarici Ticarət Palatası (AHK Azərbaycan) 90-a yaxın biznes nümayəndəsinin iştirakı ilə AHK Üzvlərinin Ümumi Yığıncağını təşkil edib. Bütün AHK üzvlərini bir yerə toplayan Üzvlər Yığıncağı ildə iki dəfə həyata keçirilir və tədbirdə AHK Azərbaycanın il ərzində təşkil etdiyi tədbirlər və əldə olunmuş nəaliyyətlər təqdim olunur.

Tədbiri salamlama nitqi ilə açan AHK İdarə heyətinin sədri cənab Anar Həsənov görüşün proqramını qısa şəkildə iştirakçılara təqdim edib. Palatanın və əməkdaşların gərgin əməyini yüksək qiymətləndirən sədr Palata üzvlərinin sayının artmasını, İmpuls tədbirlərinin uğurla həyata keçirilməsini, AHK İşçi Qruplarının yeni işçi heyətinin təyin edilməsini, Almaniyadan nümayəndə heyətlərinin Azərbaycana səfər etməsini və çox sayda fiziki tədbirlərin uğurla baş tutmasını özəlliklə vurğulayıb.

Almaniya Federativ Respublikasının Azərbaycandakı səfiri Dr. Ralf Horlemann, AHK üzvlərini salamlayaraq, səfirliklə bağlı yenilikləri bölüşüb. Cənab Horlemann Almaniya və Azərbaycan arasında diplomatik münasibətlərdən söz açaraq, Cənab İlham Əliyevin qısa müddət öncə Almaniyaya səfərini iki ölkə arasındakı dostluq münasibətlərinin nəticəsi kimi qeyd edib. Həmçinin Cənab Səfir Azərbaycanda açılan yeni alman şirkətlərinin iki ölkə arasındakı iqtisadiyyata təsirlərindən, iki ölkə arasında siyasi, təhlükəsizlik, və mədəniyyət sahələrində əməkdaşlığın inkişafından da söz açıb. Çıxışını yekunlaşdıraraq, o, davamlı uğurlu əməkdaşlığa görə Palataya minnətdarlığını bildirib.

Daha sonra AHK Azərbaycanın İcraçı Direktoru cənab Tobias Baumann AHK Azərbaycanın fəaliyyəti və maliyyə göstəriciləri, o cümlədən ötən ilin nəaliyyətləri və növbəti illərdə nəzərdə tutulan layihələr haqqında qısa hesabatı qonaqlara təqdim edib.

“Ötən ilin sonuncu Üzvlər Yığıncağından etibarən AHK Azərbaycana 14 yeni şirkət üzv olub və hal-hazırda Almaniya və Azərbaycandan iqtisadiyyatın müxtəlif sahələrini təmsil edən 167 şirkət Palatamızın üzvüdür. Sevindirici haldır ki, bütün çətinliklərə baxmayaraq, Palatamızın keyfiyyətli işi və öhdəliyi sənayenin müxtəlif sahələrindən yeni şirkətləri cəlb etməyi bacarır.”

Üzvlərin Ümumi Yığıncağının qərar qəbul etməsi üçün kvorumun təyin edilməsindən sonra üzv  şirkətlərin nümayəndlərinin ümumi razılığı ilə 2023-cü il üçün xəzinə nəzarətçiləri təyin olunub. Aşağıda AHK Azərbaycanın 2023-cü il üçün təyin olunan xəzinə nəzarətçiləri ilə tanış ola bilərsiniz:

Türkan Hacıyeva - BHM Legal Firm LLC şirkətinin Korporativ və Maliyyə Departamentinin meneceri

Sevinc Rəhimova - SERA Holding LLC şirkətinin təsisçisi

İlqar Əliyev - Industrial Solutions LLC şirkətinin rəhbəri

Tədbir Süleymanbəyli Qrupunun ifasında canlı musiqinin müşayiətində işgüzar şam yeməyi ilə yekunlaşıb.